Khamis, Januari 08, 2009

EPL 08/09 - Namo team ese

Sajo yo nak kona’an team-team ese kek kengkawan. Kok masuk mano-mano league, dan jumpo namo-namo team ni atau botombung secagho ‘head-to-head’, itu team ese lah tu. Sumo team ese guno namo team bosa di seghato dunio tompi ese solit’an namo tompek-tompek kek Malaysia terutamo eh tompek-tompek yang dokek ngan hidup ese.

Ese mulo’an ngan ‘Geylangtasaray’. Bosompono nama klab bosa di Turkey,
Galatasaray SK dan disolit’an namo Kampung Geylang Terusan kek Poghotang Jolobu. Kampung Geylang Terusan ialah namo kampong uwan ese, mako jadilah deh cam tu. Ponah menjuarai Liga Super 2007/08.

Lopeh tu, ‘Bayaii Leverkusen’. Berasal daghi namo kelab Bundesliga Jerman,
Bayer Leverkusen, tompi namo Bayer tu diganti’an mo namo Bayai. Bayai ialah namo kampong dalam daeghah Jompo, dokek ngan Simpang Poghotang. Ado sikit kesilapan maso mendaftar namo team, Bayai tolah diijo sebagai ‘Bayaii’. Walaupun bulih dipindo, tompi ese bokonan pulak ngan ‘kesilapan’ itu.

‘Tembunham Hotspurs’. Iyo… mang tak dapek disangkal’an laie namo team di BPL,
Tottenham Hotspurs FC. Kali ini monyolit’an namo Kampong Tembun, sebuah kampong kek Klawang.

Dek meminati klab Itali,
AC Milan sojak zaman Gullit, Baresi, Rijkaard, van Basten lopeh tu Bierhoff pulak, ese pun beminat menamo’an team ese bosompono AC Milan. Namo Milan tu ese ganti’an mo Melang. Melang tu namo kampong kek Kolopilah. Mako jadilah ‘AC Melang’. Muncul juaro Liga Super 2004/05 dan 2006/07.

Klab Turki sudah, klab Jerman pun sudah, Itali mo Inggeris pun sudah. Kali ini klab Sepanyol pulak iaitu
Deportivo La Coruna. Tompi cagho monyolit’an namo kampong agak unik. Dek ese lah. Namo kampong yang ese pilih kali ini ialah Kampong Lakai, pun kek ngan Simpang Poghotang. Mako jadilah ‘Deportivo Lakai Runa’. Unik eh kek susunan sukukata daghi 4-1-3 jadi 4-2-2 tapi tonasi eh tetap samo.

Itulah limo team ese kek BPL Fantasy Football. Selain tu, ese ado satu team kek UCL Fantasy Football. Namo eh ‘Werder Branang’. Hehe… taukan gabungan eh? Iyo. Klab
SV Werder Bremen dari Jerman bergabung ngan Beranang, namo tompek kek sempadan NS/Selangor.

Namo-namo yang ponah ese guno’an sobolum ni:
· Ajax Ampangan – klab
Ajax Amsterdam dan Ampangan, Soghomban.
· Baningham City – klab
Birmingham City dan Kg. Air Baning.
· Borussia Mengkangladbach – klab
Borussia Mönchengladbach ngan Kg Mengkan.
· Manchister City – klab
Manchester City ngan Kg Manchis, Bentong Pahang. Kampong ni kek sempadan Jolobu mo Pahang. Alah yang masuk kek TV9 rancangan Apa Khabar Orang Kampung aghitu.

Namo-namo tu ese guno’an maso Piala Dunio 2006 aghitu. Maso tu buek sampai 10 team soghang sobab eh ado tawaran hadiah dari penganjur tempatan. Selain Grand Prize, setiap pusingan ado cenderomato. Setiap malam sobolum pelawanan Shebby dan kengkawan se’pundit’ eh akan komen pasal bondo ni. Ado soghang kawan opis ese, team eh disenarai’an kek TV, solang duo aghi ado Poslaju datang hanta’an ‘pewter’ puk dio.

Namo-namo lain yang ponah terlinteh tompi bolum ponah diguno’an laie pasal ghaso eh namo2 itu tak beghapo nak kono bunyi eh atau team tu orang tak beghapo nak kona.
· AS Rombau
AS Roma & Rombau
· Real Beting
Real Betis & Kg Beting
· Sakeh 04
Schalke 04 & Sakeh (namo jalan kek Muar)
· Jelintus – klab
Juventus ngan Kg Jelin.

Takdolah soho ese sampai nak mem’patent’kan namo-namo tu doh, tompi dongan ter’blog’ eh rencano ini, bih kurang cam tu lah deh tu.

Tiada ulasan: